Perezida w’Inteko Ishinga Amategeko ya Tanzania, Mussa Azzan Zungu, yatangaje ko abadepite bagiye i Rabat muri Maroc gushyigikira ikipe y’abatarengeje imyaka 17 ya Tanzania (Serengeti Boys) batari bafite uburenganzira bwatanzwe n’Ibiro bya Perezida w’Inteko.
Chief Editor 
Mu nama y’Inteko Ishinga Amategeko yabaye ku wa 4 Kamena 2026 i Dodoma, Zungu yavuze ko mbere y’umukino wa nyuma wa CAN U-17, Perezida wa Tanzania yari yatanze indege kugira ngo abafana n’abayobozi bajye gushyigikira iyo kipe.
Serengeti Boys yari yageze ku mukino wa nyuma w’Igikombe cya Afurika cy’abatarengeje imyaka 17 cyabereye muri Maroc.
Yavuze ko bamwe mu badepite bifatanyije n’urwo rugendo ariko bakaba baragiye mu mahanga badafite uburenganzira busabwa n’amategeko y’Inteko.
Zungu yasabye Umunyamabanga Mukuru w’Inteko kwandikira abo badepite bose bakagaragaza impamvu batubahirije amabwiriza agenga ingendo z’abadepite zijya mu mahanga.
Yabahaye iminsi ine yo kuba batanze ibisobanuro byabo, anavuga ko nibaramuka bahamwe no kutubahiriza amategeko y’Inteko bashobora gufatirwa ibihano biteganywa n’amategeko.
Serengeti Boys ya Tanzania yatsinzwe na Senegal ku mukino wa nyuma w'Igikombe cya Afurika cy'abatarengeje imyaka 17 (U-17 AFCON 2026).
Nyuma yo kunganya 1–1 hiyambajwe
penaliti maze Senegal itsinda 4–2 za Tanzania, Senegal ihita yegukana igikombe.
Bagabo John
