Muri Canada, inzego z'ubutabera zareze Geoffrey Wall w'imyaka 59 y'amavuko, wahoze ari umupilote w'ikigo cy'indege cya Air Canada, nyuma yo gutahura ko yamaze imyaka 16 atwara indege zitwara abagenzi adafite uruhushya rwo ku rwego rwo hejuru rwemewe ku bapilote b'indege nini zitwara abagenzi.
Chief Editor 
Nk'uko Polisi yo mu Ntara ya Peel yabitangaje, Wall akekwaho kuba yarakoze akazi k'Umuyobozi Mukuru w'Indege (Captain) hagati ya mwaka wa 2009 na 2025, aho yakoze ingendo zirenga 900 zo mu gihugu imbere no mu mahanga, nyamara adafite uruhushya ruzwi nka Airline Transport Pilot Licence (ATPL), ari rwo ruhushya rwo hejuru rusabwa abatwara indege nini z'ubucuruzi zitwara abagenzi.
Sosiyete Air Canada yatangaje ko uwo mupilote yari afite uruhushya rwemewe rwo gutwara indege z'ubucuruzi, ariko ko yahawe inshingano zo kuba Captain atarangije ibisabwa byose kugira ngo ahabwe urwego rwisumbuye rw'uruhushya rw'ubupilote.
Iyi sosiyete yavuze ko ikimara kumenya icyo kibazo yahise imuhagarika ku kazi, inabimenyesha inzego zishinzwe kugenzura ibikorwa by'indege.
Uretse icyaha cyo gukora akazi adafite uruhushya rukenewe, Geoffrey Wall anashinjwa guha Polisi amakuru atari yo ku bijyanye n'inyandiko ze z'ubupilote, aho yavuze ko zari zaribwe.
Kuri ubu iperereza rirakomeje kugira ngo hamenyekane neza uko byagenze n'uruhare rwa buri wese muri iki kibazo cyateye impungenge mu rwego rw'ubwikorezi bwo mu kirere
Bagabo John
